
İyulun 10-da Ağdərə rayonunun Həsənqaya kəndində minanın partlaması nəticəsində bir mülki şəxs xəsarət alıb. Daxili İşlər Nazirliyi, Baş Prokurorluq və Azərbaycan Ərazilərinin Minalardan Təmizlənməsi Agentliyindən (ANAMA) verilən məlumata görə, partlayış minalardan təmizlənməmiş ərazidə baş verib.
Zərərçəkən rayonun Şıxax kənd sakini, 1979-cu il təvəllüdlü Qulu Tufan oğlu Quliyevdir. O, mal-qara otararkən piyada əleyhinə minaya basıb, nəticədə sol ayağından ağır xəsarət alıb.
Zərərçəkmiş dərhal Tərtər Mərkəzi Rayon Xəstəxanasına çatdırılıb və ona tibbi yardım göstərilib. Onun vəziyyəti stabil olaraq qiymətləndirilir.
Hadisə yerində hüquq-mühafizə orqanlarının əməkdaşları və ANAMA-nın mütəxəssisləri işləyir. Hadisənin bütün hallarının müəyyən edilməsi üçün Tərtər Rayon Prokurorluğunda araşdırmalara başlanılıb.
Azərbaycanpolisi.az